شيء جميل ان يبقي ليك شخص بتثق في وجهة نظره و تحب تحكي معاه و تأخذ رأيه في امورك الشخصية و يبقي هو مصدر الدعم ليك
بس أنت محتاج كل فترة تقعد تراجع نفسك و تشوف هل الشخص ده بيفيدك و لا بيضللك ؟
هل اقتراحاته و وجهة نظره بتحل مشاكلك و لا بتخسرك ؟
هل حلوله و رأيه مناسبين ليك و لا لأ ؟
طيب ليه؟؟ عشان القلوب بتتقلب و النفوس بتتغير عشان وجهة نظره دي ممكن تبقي مناسبة لخبراته و حياته و مش مناسبة ليك أنت عشان في ناس بتحب اوي دور المنقذ و تعيشك دور الضحية و وقتها هتلاقي نفسك مدمن الشخص ده و عاجز عن حل مشاكلك بدونه و عشان أنت أصلا قادر علي حل مشاكلك لوحدك و مش محتاج تخلي حياتك كتاب مفتوح لحد و عشان أنت موضوعك بيخلص و بتنسي بس اللي بتحكيله بياخد فكرة دايمة و مش بتتغير عنك هقولكم شوية أمثلة : واحدة تشتكي لاهلها ان جوزها بيتأخر بره البيت يقولوا ليها خلي بالك و راقبيه و أكيد بيعمل حاجة غلط , تروح الزوجة تتخانق و تقوله انها شاكة فيه ( الأهل أصلا عندهم حد يعرفوه كان بيتاخر و طلع متجوز علي مراته و بيسقطوا ده علي جوز بنتهم ) واحد بيشتكي لصحابه ان مديره في الشغل بيحمله شغل زيادة , يقوم ينصحه انهم كده بيستغلوه و بعد كده هيطلع عينه ( المدير في الأساس بيحب الشاب ده و بيثق فيه و كان ناوي يرقيه) واحدة تدخل تكتب في جروب عن مشكلة مع جوزها او حماتها , تلاقي الكومنتات كلها اتطلقي !! ياما شفنا أهالي دمروا لأولادهم حياتهم الزوجية ياما شفنا اصحاب نصائحهم تودي في داهية
ياما شفنا ناس مريضة و بتعاني من مشاكل
نفسية و كلامهم معسول و بيسقطوا مشاكلهم علي غيرهم
هل ده معناه أني مثقش في حد ؟ لا طبعا ، في ناس وجودهم في حياتنا نعمة , بس زي ما قلت النفوس بتتغير و القلوب بتتقلب ، محتاج تراجع نفسك كل شوية و تشوف الشخص ده بيفيدك و لا بيضرك محتاج كمان تثق في قدرتك أنت علي حل مشاكلك و انك تغلط و تتعلم و تقع و تقوم تقف و تبقي اقوي و عشان مش دايما الشخص ده هيبقي موجود ، طيب من غيره هتعمل ايه ؟ هتنهار ؟ ربنا بيحاسبنا علي افعالنا احنا ، و معتقدش ينفع نقول يوم الحساب اصل فلان هو اللي قالي اعمل كده , أنت شخص بالغ عاقل تحاسب علي أفعالك ، و كل نفس بما كسبت رهينة .
فضفض....اسمع ..... راجع ....فلتر
لو الكلام مناسب ليك جرب

و اخيرا ثق في قدراتك
و احمد ربنا لو في حياتك الشخص الصح
اللهم اصلح أحوالنا جميعا ❤️