اليوم معى احلى الطرق لعمل الحواوشي بطريقه سهله وسريعه وكمان اضمن من المحلات نضمن النظافه










هتفرمى نص ك لحمة وعليها حتت سمين مش كبيرة بس عشان تبقى مادة دهنية فيه . وان مش عاوزة براحتك ... وتقطعى قرن فلفل رومى كبير . وبصلة كبيرة مبشورة . وحبة طماطم متقطعة . وانزلى بالتوابل بتاعتك . ملح . فلفل اسود . رشة قرفة مطحونة . رشة جوزة الطيب . ورشه كارى . وبابريكا خشنة . او اى توابل بتحبيها . وطبعا ياسلام أن ضفتى شطة . وتقلبيهم كلهم مع المفروم . وتجيبى العيش تفتحيه للحشو . وحاولى تجيبى عيش ابيض شوية مش متقمع اللون . انا هنا حشياه عيش ابيض صغير . قبل ما تحشى المفروم بتدهنى الرغيف من الوشين بخليط من الزيت والزبدة . وبعدين تبدأى تحشى . وتسخنى طاستك الجريل وتكونى دهناها زيت . وإن غير متاح عندك الجريل . ادهنى صاج الفرن ورصى العيش وغطيه بفويل عشان ما ينشفش . . . وبعد ما سخنت الجريل رصيت العيش . وقفلت الغطا . ومفيش ٣ دقايق فتحت قلبت الوش التاني وهكذا حسب الكميه اللى معاكى . وقدمت معاه طماطم متقطعة ومحطوطة فى خل وملح وكمون وشطة . وطبق طحينة ...... المقادير بتزيد حسب كميتك المطلوبة .