* طبخ الباستا الطازه
:



الباستا الطازه تنطبخ تقريبا
زي الباستا العاديه . يعني قدر كبيره وكمية مويه كبيره . وبعد مع ملح بس بدون أي أي
زيت بعد لنفس الأسباب ولو إن الأثر هنا أقل كثير من الناشفه .


الفرق هو إن في الباستا الطازه المويه تغلي على
غليه جدا خفيفه عكس الناشفه اللي لازم تكون على أقوى غليه . السبب هنا هو إن
الباستا الطازه لينه وسهل جدا تتقطع أو حتى تتفكك لو كانت محشيه وعشان كذا تنطبخ
على حراره أقل .




متى تستوي الباستا
الطازه ؟ الباستا الطازه أبدا ما تتقدم وهي ألدنتي !! .. لازم تكون مستويه ولينه .
أهم شي ما تطبخونها أكثر من اللازم كونها ممكن تشرب المويه بزياده وهذا يخلي طعمها
يخرب بس عموما هي جدا متسامحه في الوقت أكثر من الناشفه . فيه حالات ماراح نسلق
الباستا أصلا وراح تشوفون تحت .



الباستا
الطازه تستوي أسرع بكثيييييير من الناشفه كونها مصنوعه من طحين أبيض موب من سميد .
فمثلا إذا كانت الباستا الناشفه تاخذ حوالي ٩ - ١٣ دقيقه بتلاقون إن الطازه مدة
طبخها ما تتعدى ٣ دقايق في الغالب . مثل الباستا الناشفه أفضل حل هو إنكم تذوقون
عشان تعرفون إذا أستوت أو لأ
.








* كيف تسوونها ؟



نجي عالنقطة المرعبة ... اللي قد
سووا بيتزا يطلعون برا ... خلاص ناجح إلا قد سوا أي خبز في حياته بعد يطلع برا كونه
بعد ناجح ... المسأله أسهل من كل أنواع الخبز اللي بخميره ومافيها كل المشاكل اللي
في الخبز .. اللي يشك إنه يقدر يسويها من أول مره يرتاح بعد المسألة مايبيلها ثاني
أو ثالث مره عشان تنضبط هي تضبط إن شاء الله من أول مره ..



طيب عشان تسوونها أول شي أعطيكم الوصفه
:




كوب طحين
أبيض


بيضتين


رشة ملح


ربع ملعقة شاهي زيت
زيتون


هذي الكمية تسويلك باستا تكفي شخصين تقريبا
...

.............................

هذي طبعا بس خط عام تمشون عليه كمية الطحين للبيض موب مهمه و القياسات
أبدا موب دقيقه ولا تحتاجون أي معيار أو شي زي كذا أصلا لأننا بنمشي بالنظر في كل
شي .



فيه أكثر من طريقة عشان تسوون الباستا . الأولى وهي التقليديه وهي اللي
في الغالب تشوفونها هي إنكم تحطون الطحين على الطاوله وتحفرون حفره في الوسط تحطون
فيها البيض . وبعدين تبدون تحركون البيض شوي شوي وتدخلون عليه طحين شوي شوي إلين
تتجمع وتصير عجينة .



الطريقة الثانيه هي إنكم تستخدمون الخلاط مثل كينوود أو كيتشن إيد ..
شخصيا أشوف العمليه شوي موب مرتبه
.



الطريقة الأفضل برأيي هو بإستخدام خلاط مولينكس أو جهاز تحضير طعام .
وهي الي بوريكم هنا . هذي الطريقة تعطي باستا بكمية المويه المناسبه بحيث ما
تحتاجين تستخدمين طحين طول الوقت . غير كذا سهل جدا تصليحها في حال غلطتي في الطحين
أو البيض أو مثلا ما كنت تعرفين كم كمية البيض اللي تحطينها لكل كمية طحين
.




أول شي نحط الطحين في الخلاط + الملح و الزيت ونخلطهم شوي بس
.



بعدين نخلط البيض بس شوي لحاله إلين يصير متجانس
.


الحين نشغل الجهاز ونبدأ نصب البيض شوي شوي من الفتحة اللي فوق إلين
تقريبا نصب نص كمية البيض . عند هذي المرحله بيكون شكل الخليط تقريبا زي شكل
البارمزان المبشور زي كذا :










الحين نبدأ نصب البيض بس ملعقة كبيره كل شوي يعني شوي شوي .. إلين يكون لنا
كتل كبيره تقريبا أقرب مالها الكسكسي ( هي تقريبا كسكسي أصلا كلهم أصلا باستا ) ...
زي كذا ...









عند هذي المرحله نوقف !! خلاص ما نضيف بيض ...



طيب لو حصل وصار و زدتي البيض حبتين إلين كونلك كوره وش تسوين ؟ تاخذين
الكوره الكبيره وتقطعينها بيدك شوي وترجعينها للخلاط . بعدين تخلطين شوي إلين ترجع
كتل زي ماكانت وتحطين ملعقة صغيره طحين إلين ترجع لمرحلة الكسكسي . بس ... يعني لو
قللتي البيض زودي إلين توصل كذا .. ولو نقصتي زودي طحين بس ... مافيها مجال حتى
للخطأ .



الحين خذي العجينة اللي بتكون زي ما قلت كتل و أبدي أعجنيها بيدك زي ما
تسوين في الخبز وغيره حوالي ٥ دقايق بس ... طبعا العجينة اللي مصنوعه في الخلاط في
الغالب ما راح تحتاج إنك ترشن طحين عالطاوله كونها أبدا ما تلصق . وهذي ميزه ثانيه
فيها . بس لو كانت تلصق أو كنتي مسويتها بيدك أعجنيها مع شوي طحين عادي
.



شي ثاني .. هذي العجينة كمية المويه قليييله فيها جدا عشان كذا شوي
بتلاقونها قاسيه و غير أي عجينة خبز قد جربتوها فلا تخافون يعني لو جتكم قاسيه
بتتصلح بعدين .


بعد العجن بيكون شكلها زي كذا
:









لاحظي موب ناعمه زي البيتزا مثلا وشوي قاسيه ..


الحين لفي العجينة بورق نايلون زييين وخليها ترتاح على حرارة
الغرفه على الأقل نص ساعه إلى ساعه وهو أفضل
.

الهدف من فترة الراحة هذي موب التخمير مثل العجاين اللي فيها
خميره . الهدف هنا هو إننا نعطي الطحين فرصة إنه يتشرب المويه . غير كذا الراحة هذي
بتريح الجلوتن ( راجعوا موضوع الخبز إذا ما تعرفون وشو الجلوتن ) .. وهذا بيخلي فرد
الباستا جدا سهل .



بالنسبة للفرد .. راح
تحتاجون مكينة فرد باستا .. طبعا هي في الأساس هذا إستخدامها بس ما قصروا اللي
عندنا خلوها لإستخدامات ثانيه مثلا فرد المطازيز مثلا .. فلا تستغربون لو طلعت
موجوده في البيت و أنتم ما تدرون .


المكاين تكون إما يدويه أو
كهربائيه ويكون لها قرص يتحرك عشان تحددين السماكه . أول شي لازم تسوينه طبعا هو
إنك تثبتين المكينة في الطاوله اللي تشتغلين عليها عشان ما تتحرك بعدين كملي شغل
...



المكينة اللي عندي وهي صراحة جدا مريحة و أنصح
اللي ما شرا يشري زيها لو لقى . المكينة كهربائية بس هي إضافه من إضافات الخلاط
كيتشن إيد اللي عندهم الكينوود أكيد فيه نفس الشي لها بعد . طبعا كوني مجرب اليدويه

قبل يعجبني في هذي إنها تسمحلك تستخدمين يدينك عشان تتحكمين في الباستا وهي داخله .
غير كذا كونها مثبتة في الخلاط ما تحتاج إنها تتثبت في الطاوله كل مره جدا جدا
مريحة .










عشان نفرد الباستا أول شي نسويه هو إننا نقسم العجينة بسكين مثلا .
الكمية اللي حطاها أقسموها قسمين أول مره وبعدين مع الوقت بتشوفون الكمية المناسبة
لكم .




نبدأ بإننا ناخذ واحد من الأقسام اللي نبي نفردها ونفرده شوي بيدنا
بحيث يسهل تدخيله للمكينة بس .. نحط المكينة على أعرض شي ونشغل ونبدأ ندخل العجينة
في الجهاز وناخذها من الطرف الثاني بس بدون ما نشدها
.


لو لقيتوا إن العجينة شوي تتلصق رشوها بشوي طحين
.

الحين خذو
العجينة و أطووها بالنص بالطول ودخلوها في الجهاز مره ثانيه على نفس العرض أعرض
شي.. هذي العملية تشبه عمليه العجن في العجاين العاديه وهي اللي تعطي العجينة قوتها
وقدرتها إنها تنفرد وتصير نحييييييييفه . لو لقيتو إن العجينة صارت عريضه أكثر من
اللازم يمديكم تطوونها بالعرض بدال الطول عشان تصلحون العرض . عيدوا هذي العملية
على أعرض شي إلين تسمعون صوت فرقعه قويه تقريبا بتحتاجون تعيدونها ٣ - ٦ مرات
بالكثير .












الحين نروح للعرض اللي بعده ونفردها مره وحده على هذا العرض بس وهذي المره
خلاص ! بدون ما نطويها . الحين خلصنا عجن وصار هدفنا هو فرد العجينة بس . نبدأ نفرد
المكينة على كل عرض مره وحده إلين نوصل للدرجة اللي نبغاها .



نقطع ونشكل العجينة هذي بالشكل اللي نبغى بعدين نرجع نعيد نفس العملية من
جديد مع باقي العجينة إلين تخلص كلها . الباستا الحين ممكن تقعد على حرارة الغرفه
ساعة ساعتين وهي مغطيه قبل طبخها أكثر من كذا ممكن تنشف . لو تبون تحفظونها لوقت
أطول مالكم إلا الفريزر .


بس هذي عجينة الباستا
...



نعيد من جديد ...


نخلط المواد في الخلاط إلين نوصل مرحلة البارمزان
.. نزيد بيض إلين نوصل مرحلة الكسكسي .. نوقف خلط ونعجن ٥ دقايق ... نريح العجينة
نص ساعة عالأقل .. نعجنها على أعرض شي إلين نسمع صوت فرقعه .. آخر شي نفردها للسمك
اللي نبغى ونشكلها أو نحشيها حسب ما نبغى .. وبس
...



نقطة أخيره ... لاحظوا إني قلت هذي موب وصفه بالتمام يعني خلوها بس خط عام
تمشون عليه ... مثلا لو كنتوا بتسوون باستا لناس كثار ضاعفوا كمية الطحين حسب
الحاجة والبيض بعد وكل المواد الثانيه وكملوا عااادي ما تحتاجون وصفه لكل كمية طحين
! كونكم ماشين بالنظر هنا .