الموضوع: أطباق متنوعة ومشهية بالصور

السلام عليكم
وبسم الله أبتدأ



أول طبق : سمكة في الفرن

سمكة نظفتها وعملت ليها الحامض
ومن بعد طحنت فلفل أخضر + كرافص + قزبر + ثوم + ملح + كامون + بزار + حامض كثير تقريبا 3 الحامضات - وعملت الخلطة في الحوتة بعدما فلحتها وخليت شوي من الخلطة وعملتها للبطاطس الصغيرة الي سلقتها عاد قشرتها وقطعتها دوائر + 2 مطيشات مقطعين طراف صغار للتزيين فقط وزوقتها بالحامض وفي الأخير قبل الفرن عملت عليها زيت الزيتون وها هي قبل الفرن
وها هي بعد الفرن



ثاني طبق : البايلا

مقلة فيها زيت شحرت فيها الفلفلة بوحدها - وتشحر بصلة مشلظة وتحيد - وتشحر شوي الكروفيت ويتحيد - ومطيشة 1 تشحر في نفس الزويتة وتحيد

و البلح سلقتو بوحدو مع مليحة وشوي الثوم

والدجاج كيتسلق حتى هو وكيكون الماء كثير والنار قوية ومني كتطلع الرغوة الفوق تيخصها تحيد لأنه هداك الدم ديال الدجاج كيطلع الفوق وأنا خليتها باش تشوفوها في الصورة

ايوا ندوزوا للمعقول
كنستعمل نفس المقلة وتكون غارقة شوي وتنديروا فيها زويتة وتنديروا فيها الرز أنا درت 3 الكيسان الرز في 6 الكيسان ديال الماء
كيتشحر الرز شوي في الزيت بعدما يتغسل وتزيدوا عليه نصف المقادير وتخليوا النصف الثاني للتزيين من الفوق
وتزيدوا العطرية الملح والبزار والزعفران شعرة
ومني تطيب نصف طيبة تزوقوها بالنصف الثاني الي خليتيوه وممكن حتى الجلبانة والذرة (الي أنا عملتهم في جهة واحدة على قبل أولادي ما كياكلوهومش) وها هي واجدة

ومني تطيب تطفيوا العافية وتخليوها واحد نصف ساعة عاد تقدموها وبالصحة



ثالث طبق : الكبسة

الدجاج كيتسلق بنفس الطريقة الي سبق لي ذكرت ولما الماء ديالو يبقى نظيف نزيد عليه 6 حبات القرنفل + 6 حبات الهيل أو قعقلة + 4 ورقة موسى + 2 عود القرفة + اللومي الي هو الحامض اليابس
في مقلة نعمل 2 بصلات كبار مشلظين حتى البصلة لونها يتغير ونزيد عليها 2 مطيشات كبار مقطعين + 2 معالق صغار عامرين ديال مطيشة الحك + الملح + البزار والفلفلة الحارة حسب الذوق

كناخد الرز البسمتي ضروري هاد الرز هو الي كيجي في الكبسة وكيتغسل ويتعمل معه الدجاج الي سلقت والصوص الي طيبت وكل كاس رز بمقدار كاس ونصف من مرق الدجاج وكيطيب على نار مهيلة وها هو مني طاب

وكيبقى تقريبا نصف ساعة عاد يتقدم ويزين باللوز المقلي وبالصحة



رابع طبق : الحمص بالكفتة

هذا الطبق في الاصل لبناني
الحمص مسلوق وكيتطحن بلا الماء ديالو + ضرس ثوم + الطحينة الي معمولة بالزنجلان ومني كيطحنوا مزيان كنبدى نزيد شوي بشوي من الماء ديال الحمص وكيكون الخليط عاقد شوي كنزيد عليه كامون + زيت الزيتون + ملح + حامض- اليمون-
والكفتة كتطيب عادية مع ملح وبزار - كنعملوا الحمص في طبق وفوقه الكفتة وفوقهم القزبر وعاد نخوي عليهم شوي زيت الزيتون من الفوق وبالصحة



خامس طبق : فول مشرمل

الفول كيكون طايب نصف طيبة ونزول ليه الراس الاسود
نعمل شوي ديال البصلة مشلضة ومني تطيب شوي نزيد عليها 2 طماطم مقطعين رقاق + ثوم + معلقة كبيرة ديال طماطم معلبة ونخليهم يطيبوا شوي عاد نزيد عليهم الفول + الملح + البزار + التحميرة الحلوة وشوي من الحارة
ومني يطيب وينشف من الماء نطفي عليه النار عاد نزيد القزبر والمعدنوس وبالصحة



سادس طبق : المقلوبة

الدجاج كيتسلق مثل العادة + ملح + بزار +الزعفران ولما ينضج نحمرو في الفرن ونخلي المرق على جنب
كنقلي الدنجال-البادنجان - دوائر ونعملو فوق ورق حتى ينشف من الزيت مع العلم أني كنعمل قليل من الزيت فقط
في طنجرة أصفف الدنجال المقلي الاول ونعمل فوقه الرز (3 كيسان رز + 6 كيسان من مرق الدجاج)
ويطيب تقريبا نصف ساعة كنجهدوا النار في الاول ومني تغلى الطنجرة كنقصوا النار ونخليوه يطيب نصف ساعة ومني يطيب نطفي عليه ونخليه شوي قبل التقديم
وعند التقديم كيتقلب الرز في طبق وبالراحة باش ما يخسرش المنظر والدنجال كيكون من الفوق وعاد الدجاج ويزين بالصنوبر المقلي وأنا ما كانش عندي الصنوبر زينتو باللوز
وتقدم معاليوغورت بدون سكر معه ملح وثوم

ملاحظة : الكبسة والمقلوبة ممكن يتعملوا بالدجاج أو باللحم وباللحم كيكون الطعم ألذ


سابع طبق : أملـــــــو

هذا خاص بالمغتربات لانه الي موجود في المغرب ممكن يكون متوفر عندو والحمد لله خيرات بلادنا كثيرة
اللوز بقشرته كيتحمر مزيان في الفرن ويتطحن مزيان ونطحن معه شوي فقط ديال الطحينة الي معمولة بالزنجلان حتى يتطحن مزيان ونبدى نزيد زيت الزيتون شوي بشوي وفي الاخير نزيد العسل حسب الذوق يأكل في الإفطار مع الخبز وبالصحة



ثامن طبق : صدر الدجاج محشي

كناخذوا صدر الدجاج ويتعمل من تحته ومن فوقه البلاستيك الغذائي ويتضرب باش يرقاق
كنعمل وسطه الجبنة مربعات أو اي نوع ولاداند طراف رقاق ونلويه ويتسد بأعواد الاسنان ويتعمل في البيض ثم لاشابلير ويتقلى باش ياخذ اللون الذهبي وعاد يدخل للفرن يطيب وها هو مني طاب

وهنا مني قطعتو وممكن نرافقوه بالبطاطس بيري الي كتعجب كل الصغار